O Concello de Ponte Caldelas suprime a taxa por licenza de actividade ou apertura de negocios
Por Redacción
O Concello de Ponte Caldelas aprobará no próximo pleno do xoves a modificación de varias ordenanzas que regulaban a concesión e as correspondentes taxas por licenzas de obras, licenzas urbanísticas ou licenzas de apertura ou actividade, co obxectivo de adaptalas a esta nova "Lei do emprendemento e a competitividade" da Xunta de Galicia que entrou en vigor en decembro de 2013.
Son en total catro ordenanzas as que se modificarán para adaptarse a esta Lei.
As taxas por obras manteranse igual e serán aboadas ao presentar a correspondente documentación, porque xa non hai que esperar á concesión de ningunha licenza. A novidade estará na taxa por licenza de actividade ou apertura de establecementos ou negocios que antes cobraba o Concello e que se correspondía cunha cantidade equivalente a unha cota anual do IAE. Agora esta cota elimínase e substitúese por unha taxa fixa de unicamente 19,85 euros, que é a mesma que se cobra para calquera trámite administrativo que requira autorización.
Con esta medida redúcese de xeito notable esta taxa, que pasa a ser case testemuñal, e que o Concello espera sirva tamén para facilitar o establecemento de actividades no municipio.
Unha novidade importante que leva consigo esta lei e que esta ordenanza adapta para Ponte Caldelas, é que o establecemento de actividades que requiren declaración ambiental da Xunta ou outras autorizacións sectoriais, supoñerá que as propias empresas ou promotores da actividade terían que tramitar directamente ante a Consellería de Medio Ambiente con carácter previo esta autorización, e unha vez conten con ela presentarán entón xa no Concello a declaración responsable coa correspondente documentación: proxecto técnico e autorización que requira.
Unha vez presentada esta documentación poderá xa iniciar as obras, no seu caso, e ao finalizalas e presentar o certificado de final de obras, iniciar xa a actividade. Antes era o Concello o que se encargaba de tramitar esas autorizacións e iso agora cambia.