Condenado a pagar 200 euros por romper as pólas dunha árbore fronte ao ambulatorio Virxe Peregrina
Por Redacción
Un veciño maior de idade de Pontevedra foi condenado ao pagamento de danos por valor de 200 euros despois de ser localizado utilizando as ramas de varias árbores do xardín situado fronte ao ambulatorio Virxe Peregrina causando estragos. A condena é dunha multa de 15 días a razón de 8 euros por día en concepto de responsabilidade civil para indemnizar os 200 euros da multa cos intereses correspondentes.
A Policía detectouno ás 7 da mañá do 11 de outubro de 2013. O voceiro municipal, Raimundo González, ironizou sobre o caso: "igual estaba facendo deporte e empregou a árbore para facer flexións".
Outra sentenza establece un castigo de oito días de localización permanente para o home que foi detectado 'in fraganti', o pasado 9 de decembro de 2013, cando furtaba un televisor de plasma, propiedade do Concello, na cafetaría no Centro Cultural de Monte Porreiro. O aparato de televisión foi recuperado.
E noutro fallo xudicial, un condutor foi condenado a indemnizar o Concello de Pontevedra por unha cantidade de 570 euros tras chocar, durante o 14 de febreiro de 2014 ás 23:35 horas, contra un farol situado na rúa Eduardo Pondal. Ao ser sometido á proba de alcoholemia por parte da Policía Local, o condutor ofreceu un resultado positivo. Por este motivo tamén se lle prohibe conducir vehículos de motor durante 8 meses e establécese unha pena de multa de 4 meses a razón de 5 euros ao día.