Ence afronta dende o luns a súa parada técnica anual
Por Redacción
Dende o próximo luns, día 24 de marzo, e ata o martes 1 de abril, a factoría de Ence en Lourizán afrontará a súa parada técnica anual, dedicada a realizar tarefas de mantemento e mellora das instalacións.
Durante este período cesarase por completo a actividade produtiva na planta para aplicar un plan de traballo no que participarán 1.127 traballadores de empresas externas, dos cales 407 proceden da bisbarra de Pontevedra, ademais dos empregados propios da fábrica.
Segundo desvelou o Grupo Ence o presuposto que se destina para esta parada técnica é de aproximadamente 7,5 millóns de euros, diñeiro que en boa parte irá destinado a melloras enerxéticas, en competitividade e ambientais.
O director do complexo pontevedrés, Antonio Casal, detallou que entre estes investimentos se encontran actuacións asociadas á mellora das chemineas e a obtención de eficiencia na produción de enerxía con biomasa e pasta de celulosa.
Segundo Casal, unha vez se rotome a actividade de Ence "o primeiro que poderá notar a cidadanía é que seguimos reducindo a visibilidade de emisións de vapor" coa intención, asegura, de "rematar con esa estampa que durante anos se coñeceu da fábrica, cun volume importante de emisións de vapor de auga".