Detido por roubar a unha vendedora da Once
Por Redacción
Axentes da Policía Nacional detiveron o pasado mércores, 19 de marzo, a un veciño de Pontevedra, de 37 anos de idade e con múltiples antecedentes policiais, como presunto autor dun delito de furto.
Acúsaselle de subtraer unha mochila a unha vendedora de cupóns da Once mentres esta realizaba o seu traballo nun expositor situado nunha céntrica rúa da cidade de Lérez.
A mochila, segundo explica a Policía, contiña diversos efectos dedicados á venda ao público valorado en 991 euros, ademais de 200 euros en efectivo.
Os feitos remóntanse ao día 28 de febreiro, día en que a vítima presentou a pertinente denuncia, tras a cal os axentes realizaron indagacións ata desencadear na identificación e detención do sospeitoso, que se produciu nas inmediacións da rúa Aduana, na cidade de Lérez.
Tras ser trasladado ás dependencias da Comisaría Provincial de Pontevedra o detido recoñeceu ser o autor do furto, aínda que segundo a súa versión quedou co diñeiro en metálico e botou a mochila co resto de obxectos a un colector de lixo.