O pazo da Buzaca cede á Deputación os seus valiosos fondos documentais
![Oskar](/web/cache/scene/uploads/xornalistas/foto/b40/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/573b7bbf54-perfil.jpg)
Por Oskar Viéitez
Os propietarios do Pazo de A Buzaca, en Moraña, acordaron ceder en depósito ao arquivo da Deputación de Pontevedra os seus fondos documentais. Trátase dun amplísimo conxunto documental de gran valor, que conta con testemuños escritos desde o ano 1455 ata o 1972, entre os que destaca a abondosísima información de carácter xenealóxico e económico correspondente aos séculos XVII, XVIII e XIX.
Esta documentación resulta de gran utilidade para o estudo de foros, vínculos, capelanías e outros aspectos da vida económica das áreas de Caldas de Reis, Moraña, Barro, Cuntis e Vilagarcía, sobre os que tiña influencia este pazo.
O Servizo de Patrimonio Documental e Bibliográfico da Deputación xa fixera no seu día o tratamento técnico e inventariado desta colección documental, así como a súa dixitalización, co obxectivo de facilitar a súa consulta, conservación e difusión.
Agora, o representante da familia propietaria do Pazo e administrador do mesmo, Enrique Varela Paz, acordou ceder en calidade de depósito temporal todo este conxunto documental, coa finalidade, precisamente, de garantir a súa conservación e difusión.