O 42% dos pontevedreses non celebra o día do pai
Por Oskar Viéitez
A Federación de Comercio de Pontevedra realizou unha enquisa de intención de gasto por habitante no Día do Pai (se se realiza algún regalo, canto se gasta e que tipo de regalo) na que se destaca que o 42% dos pontevedreses consultados non o celebra.
Os comercios da provincia facturarán sobre 11,49 millóns de euros con tal motivo, sendo o gasto medio por persoa de ao redor de 30,8 euros. Ao ter xa formulado estas cuestións en edicións anteriores, a Federación puido facer comparativas e destacan que en relación co ano pasado se produciu un lixeiro incremento do 0,9%.
- Nas persoas entre 15 e 29 anos, o gasto medio é de 21,58 euros, efectuando regalos o 68% dos enquisados.
- Os pontevedreses entre 30 e 49 anos, teñen un gasto medio de 38,12 euros, efectuando regalos o 60% dos enquisados.
- De 50 anos en diante, o gasto medio é de 33,41 euros, e tan só regala o 12% dos enquisados.
A Federación estima que no concello de Pontevedra o gasto estimado ascenderá a 1,3 millóns de euros.
Os principais artigos que se regalan son, en primeiro lugar: roupa e complementos, seguido polos dispositivos electrónicos, a continuación artigos de perfumaría e por último libros.
Dende a Federación de comercio, que preside o pontevedrés Antonio Reguera, destacan que este ano ao non ser festivo o día do pai se celebra menos que noutras ocasións "algúns trasladan a celebración á fin de semana ".
O 51% dos enquisados celebra unha comida familiar na casa cun gasto medio por persoa de 8 euros. O 7% dos enquisados celebra o día do pai cunha comida nun restaurante cun gasto medio por persoa de 18 euros. O 42% dos enquisados non celebra o día do pai.