Raciño embarcará o luns no Porto de Marín para ser liberado no Gran Sol
Por Redacción
Este luns terá lugar a liberación ao seu hábitat do lobo mariño "Raciño" tras a súa recuperación dende o mes de xaneiro no Instituto Galego de Formación en Acuicultura (IGAFA) da illa de Arousa.
Estes traballos son desenvolvidos pola Dirección Xeral de Conservación da Natureza, a través do servizo asistencia á fauna mariña ameazada do CEMMA (Coordinadora para o Estudo dos Mamíferos Mariños) que permite xestionar a Rede de Varamentos de mamíferos e réptiles mariños de Galicia.
O mamífero mariño será embarcado pola mañá no Porto de Marín e trasladado ata a zona de Gran Sol grazas a participación do barco "Ferreira Martinez". A liberación terá lugar 48 horas despois nas augas internacionais da zona sur de Irlanda.
A HISTORIA DO LOBO "RACIÿO"
O pasado 8 de xaneiro foi localizado na praia de Razo en Carballo o lobo mariño cincento. O animal atopábase varado e negábase a voltar ao mar.
"Raciño" tivo que ser ingresado para a recuperación en medio artificial controlado, pois presentaba unhas lesións incisas por todo o corpo motivo dun ataque doutro lobo mariño ou dun can.
RESULTADO DOS VARAMENTOS DA ESPECIE
A tempada de lobos mariños deste ano foi especialmente dura xa que se rexistraron máis de 30 entre exemplares recollidos varados ou capturados mortos e observados vivos, mentres que en anos anteriores foron rexistrados dous ou tres animais cun máximo de 13 no ano 2006.
Lamentablemente tres exemplares recollidos para recuperación non sobreviviron, en dous casos puideron recuperarse e ser liberados, ademais de "Raciño", foi liberado outro exemplar: "Morouzos", recollido en Ortigueira e liberado o pasado xoves día 13 dende o porto de Celeiro coa colaboración do barco "Anxuela".