Inventa o roubo do seu móbil e remata imputado por denuncia falsa
Por Oskar Viéitez
Un mozo de 18 anos de idade, veciño de Pontevedra, foi detido como presunto autor dun delito de simulación de infracción penal.
Segundo informan dende a Comisaría da Policía Nacional, os feitos sucederon o día 7 de marzo, cando o agora imputado denunciaba nestas dependencias ter sido vítima da subtracción do seu teléfono móbil.
Ao parecer e segundo relatou na súa denuncia, cando camiñaba polas proximidades da Avenida Eduardo Pondal sobre as 08.30 horas da mañá, cruzouse cun rapaz de fronte co que tropezou e instantes despois decatouse de que lle faltaba o móbil.
A raíz da denuncia os axentes iniciaron as investigacións para o total esclarecemento dos feitos.
Estas mesmas fontes oficiais aseguran que unha vez citado novamente na Comisaría para prestar declaración, o mozo recoñeceu ter presentado unha denuncia falsa, en realidade o teléfono non llelo subtraeran senón que o tería perdido no transcurso da noite.
Posteriormente, o mozo foi informado dos seus dereitos como imputado non detido e da obriga de comparecer ante a Autoridade Xudicial cando para iso fose requirido.
Signifícase que o mozo en dependencias policiais declarou descoñecer as consecuencias de presentar unha denuncia falsa.