Lores, tras as declaracións do comisario: "Hai xente á que lle custa entender que o espazo público é para as persoas"
Por Natalia Puga
O alcalde de Pontevedra, Miguel Anxo Fernández Lores, respondeu este xoves ás declaracións realizadas polo comisario xefe provincial, José Juan Diaz Jiménez, insistindo en que "ningunha barreira física nin de ningunha outra índole vai impedir que os vehículos da Policía Nacional continúen patrullando absolutamente todas as rúas desta cidade".
Aínda que estas declaracións se poden interpretar como unha crítica ao Goberno local no marco da polémica pola instalación de bolardos na rúa Peregrina, Lores quixo fuxir de polémica e restoulles importancia.
Lores, presente no acto no que falou o comisario, asegura que non se deu por aludido. "En todo caso, resultoume un pouco sorprendente esa primeira frase", sinala. En alusión a que, xusto despois, o responsable policial indicou que esa tarefa policial de patrullar a cidade "non é en absoluto incompatible co modelo de cidade que se desenvolveu en Pontevedra".
"Quedou aclarado coa explicación posterior. Non creo que haxa problema ningún nin me sentín aludido", insistiu o alcalde a preguntas dos medios de comunicación.
Nesa aclaración posterior, o comisario defendeu o modelo de cidade "humanizado" e lembrou que "foi premiado en diversas ocasións" e que sobre el "interesáronse cidades tanto do noso país como do estranxeiro" .
Aínda que restou importancia á posible polémica, Lores contextualizou estas afirmacións en que "hai xente á que lle custa entender que o espazo público é para as persoas" . Así, para o rexedor, "pode haber algunha xente que non se acabe de enterar de que nós temos unha filosofía totalmente distinta á doutras cidades, para nós a prioridade son as persoas".
Quixo aclarar tamén que "esta é unha cidade á que podes chegar co coche a absolutamente todos os sitios; outra cousa é que se poida cruzar por onde che dea a gana, pero das unha voltiña e chegas a todos os sitios".
Ademais, aproveitou para defender eses bolardos da rúa Peregrina. Lembrou que é responsabilidade do alcalde e do Concello favorecer os circuítos peonís e "cando notamos un número excesivo de vehículos que dificulta ese tráfico peonil, se toman medidas".
Eses bolardos extraíbles, para Lores, eran unha medida "necesaria" e "está funcionando perfectamente".
Relacionadas:
-
O PP insiste na súa postura contra os bolardos da Peregrina, unha decisión "unilateral" de Lores que ve "inentendible"
Por Natalia Puga |
-
"Ningunha barreira física vai impedir que a Policía Nacional continúe patrullando todas as rúas desta cidade"
Por Natalia Puga |
-
O PSOE reitera o rexeitamento aos bolardos en Peregrina: "non consta informe da Policía Local que avale a súa instalación"
Por Redacción |
-
Os bolardos de Peregrina seguirán durante "meses" porque, segundo Mosquera, están funcionando "moi ben"
Por Alejandro Espiño |
-
Duros reproches ao BNG pola súa "nula xestión" para resolver os incidentes na Ferrería ou Campolongo
Por Alejandro Espiño & Mónica Patxot |
-
"Menos bolardos, máis policía", a petición do sindicato SUP ante o "desprezo" do goberno local cos bolardos
Por Natalia Puga & Mónica Patxot |
-
A instalación dos bolardos na rúa Peregrina non foi unha medida consensuada
Por Oskar Viéitez |