A CXT asegura que a xornada de folga tivo en Pontevedra una "moderada e desigual incidencia por sectores"
Por Oskar Viéitez
"Moderada e desigual incidencia por sectores" tivo en Pontevedra, segundo a CXT, a convocatoria de folga xeral feita por este sindicato na xornada do venres 27 de setembro.
Tratouse dunha acción de protesta a nivel nacional polo "Paro do xenocidio e o fin do apartheid en Palestina".
Segundo apunta a CXT, houbo unha "apreciable e destacable repercusión nos centros de ensino medio, facultades do campus universitario e oficinas da administración galega e estatal, pero parcial e moi reducida nos sectores produtivos, industriais ou de servizos".
En canto á manifestación convocada durante esta xornada de mobilización aseguran que "foi unha das máis numerosas habidas na nosa cidade nos últimos tempos".
Cifran en "máis de 600 persoas", as que acudiron ao chamamento realizado por CXT e o colectivo "Pontevedra por Palestina", percorrendo rúas principais da cidade desde a rúa Loureiro Crespo diante do Hospital Provincial ata a Subdelegación do Goberno.
Os manifestantes detivéronse ante as oficinas do Banco de Santander para expresar o seu rexeitamento a esta entidade pola "participación e apoio financeiro ao militarismo israelí, responsable do xenocidio e as matanzas sobre Palestino". Durante a parada, un grupo de manifestantes, abriu unhas bengalas ao aire coas cores da bandeira palestina.
A manifestación concluíu cunha intervención dos representantes das organizacións convocantes nas escalinatas da Subdelegación do Goberno.