Verducido pecha os actos do Entroido pontevedrés cunha festa o sábado
Por Redacción
A parroquia de Verducido pechará o vindeiro sábado os festexos vinculados co Entroido no término municipal de Pontevedra a través da celebración da súa habitual 'Festa de Entroido'. Haberá actividades de tarde e de noite pensadas para todos os públicos.
A festa contará con actividades de animación infantil a partir das 17.00 horas do sábado 15 de marzo e, ás 21.00 horas, comezará a 'Festa de Carnaval', amenizada polos tríos Calibre e Sabor. Pola noite a comisión organizadora premiará os mellores disfraces dos asistentes.
A comisión está integrada por Blas Vázquez, Juan Lores, Gonzalo Pérez, José M. Acha e José Lores. Os tres primeiros reuníronse esta semana coa deputada provincial Ana Isabel Vázquez para presentarlle o programa de actos que teñen preparado. A deputada eloxiou a súa implicación coa dinamización social desta parroquia.