Unha enquisa buscará facer unha radiografía da realidade do alumnado LGTBIQA+ nos institutos pontevedreses
Por Natalia Puga & Mónica Patxot
En cumprimento seus "compromisos prioritarios" coa igualdade e o respecto á diversidade, o Concello de Pontevedra acaba de encargar unha enquisa que busca facer unha radiogrfía da realidade do alumnado LGTBIQA+ e da diversidade sexual e de xénero nos institutos de Pontevedra.
"Nesta tarefa temos que ser rigorosos e responsables fronte a tanta desinformación e fronte aos que se resisten a avanzar nunha sociedade diversa e igual", explicou a concelleira de Igualdade, Anabel Gulías, e queren contar con información real e actualizada.
A enquisa realizarase nos institutos pontevedreses ao alumnado e profesorado de ESO, Bacharelato e Formación profesional e será anónima e voluntaria.
O obxectivo é superar os 1.000 cuestionarios, para aumentar os datos que se conseguiron nunha primeira sondaxe destas características realizada no ano 2019, cando participaron 893 persoas.
Os primeiros resultados daranse a coñecer o 19 de outubro no Teatro Principal con motivo do 'VII Congreso Pinto e Maragota: A diversidade nas aulas, materia pendente?' e os resultados definitivos estarán na recta final do ano.
Esta enquisa busca ampliar e actualizar a información que ten o Concello de hai cinco anos. Buscarán comparar e analizar a evolución das vivencias e percepcións do colectivo LGTBIQA+ e da comunidade educativa en xeral, desde os prexuizos á convivencia.
Así, farán preguntas para saber se o alumnado está dentro ou fóra do armario, se foron discriminados ou foron vítimas de agresión físicas ou verbais pola súa orientación sexual ou identidade de xénero, sobre conceptos que xurdiron desde a enquisa de 2019 como a asexual e a intersexualidade e sobre o impacto das redes sociais.
As preguntas tamén chegarán ao profesorado, peza fundamental para a educación en igualdade e o respecto á diversidade. Na enquisa anterior só participou o 4%.
PULO AO CIDES
Dentro das iniciativas promovidas pola Concellería de Igualdade neste eido, Gulías anunciou este mércores que lle van dar "un novo pulo" ao CIDES (Centro de información en diversidade e sexualidade). Van "reformulalo" e sacarase a licitación.
Relacionadas:
-
Denuncian que os centros de ensino galegos non son "espazos seguros" para o alumnado LGBT
Por Redacción |
-
A memoria e realidade LGTBIQ+ chega aos institutos de Pontevedra a través da peza documental "Persoas S.A."
Por Redacción |
-
O 82% do alumnado ten limitacións para comunicarse cos seus profesores, cunha maior afectación no ámbito rural
Por Redacción |
-
O congreso 'A diversidade sexual e de xénero nas aulas' reunirá a 250 persoas en Pontevedra
Por Redacción |