A Xunta actuará nos xacementos arqueolóxicos da illa de Tambo
Por Redacción
O conselleiro de Cultura, Lingua e Xuventude, José López Campos, anunciou este venres que a Xunta de Galicia actuará nos xacementos da illa de Tambo co obxecto de "recuperar e pór en valor o seu significativo patrimonio cultural".
López Campos fixo este anuncio durante a visita que realizou xunto ao alcalde de Poio, Angel Moldes, a este enclave natural, do que defendeu a súa "preservación e conservación" por parte da administración galega.
No seu percorrido pola illa o conselleiro fixo fincapé no "importante valor deste espazo único" e incidiu no compromiso do goberno galego coa recuperación deste tipo de contornas, "que contan con importantes bens patrimoniais".
Precisamente, tirou proveito desta visita para adiantar que está prevista para o vindeiro ano 2025 levar a cabo unha serie de sondaxes nos restos arqueolóxicos de Tambo.
Segundo precisou, o obxecto é "investigar sobre o xacemento e recompilar máis información".
Ao respecto, lembrou que xa durante o pasado ano a Dirección Xeral de Patrimonio estivo a realizar escavacións. Nelas atoparon pezas e elementos patrimoniais que poderían corresponderse cunha posible capela, polo que o conselleiro incidiu en que "se seguirá a traballar para profundar no estudo e catalogación dos bens atopados nestes achados".
Os restos arqueolóxicos visitados hoxe forman parte dun asentamento situado no monte central da illa. Consta dun recinto principal que ocupa a parte máis elevada, cunha planta circular e afloramentos de batolitos graníticos. Está defendido de forma natural e non se teñen atopado, ata o momento, restos de construción.