As familias do CEIP San Clemente rexeitan a eliminación de docentes e dunha unidade de Infantil: "Este absurdo recorte incumpre a propia normativa da Xunta"
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
As familias da comunidade educativa do CEIP San Clemente súmanse ás críticas do alcalde de Caldas de Reis pola eliminación das tres liñas de Educación Infantil e os dous docentes e rexeitan "de forma contundente esta decisión ilegal e inxustificada da Consellería de Educación".
Indican que esta "incomprensible medida" publicouse no DOG do 21 de agosto, é dicir, en pleno período vacacional e a 20 días do comezo das clases, "cando as familias xa tiñamos formalizada a matrícula dos nosos fillos e fillas, aos que se lles prometera unhas condicións moi diferentes ás que agora nos atopamos".
Con todo, "o realmente grave é que este absurdo recorte incumpre a propia normativa da Xunta no que se refire a Educación Infantil, xa que provocará que se rebasen as ratios legais de alumnado por aula", agrupando en dúas liñas as crianzas de 3, 4 e 5 anos. Esta situación "choca cos límites aprobados no 2009 e ratificados o pasado ano" e obvia a presencia de cativos con necesidades especiais reconocidas pola administración, o que eleva o total a 29. "Isto impide, coa lei na man, reducir o número de aulas", critican.
"A solución, en palabras da dirección do centro e a falta de confirmación polo goberno autonómico, pasa por recuperar un mestre e ofrecer un desdobre", algo que as familias consideran "totalmente insuficiente, xa que ao non restaurar a liña de xeito oficial se perdería o persoal de apoio vinculado a ela".
"As familias que eliximos escolarizar os nosos fillos e fillas en San Clemente fixémolo atraídas por un modelo de proximidade e apoio á educación que, agora, foi posto en serio perigo por esta decisión", subliñan, e consideran que "este tesoirazo ataca directamente as señas dunha identidade que foi a que nos fixo decantarnos por este centro e por iso nos sentimos dobremente estafados".
Por todo iso, "non aceptaremos ningunha solución por debaixo do que tiñamos ao final do curso pasado, cando formalizamos a matrícula: tres liñas de Educación Infantil con todos os servizos vinculados a elas", conclúen.
Relacionadas:
-
Galicia é a Comunidade Autónoma que ten o maior ratio de escolarización por poboación 0 a 3 anos de toda a España
Por Oskar Viéitez |
-
O Concello de Caldas critica a eliminación da terceira unidade de educación infantil no CEIP San Clemente
Por Redacción |
-
O Concello de Caldas critica a eliminación de docentes e unha unidade de Infantil no CEIP San Clemente
Por Redacción |
-
O IES de Soutomaior demanda un grupo de atención á diversidade
Por Oskar Viéitez |
-
Preocupación no CEIP San Martiño pola redución do profesorado de apoio
Por María José Pita |
-
A ANPA do CPI O Toural alerta do recorte de profesorado para este novo curso e anuncia protestas
Por Redacción |