Dous días para coñecer a figura de Frei Martín Sarmiento e a súa relación con Poio
Por Redacción
O Concello de Poio, en colaboración coa Asociación Irmandade Illa de Tambo, organiza os vindeiros 13 e 14 de setembro unhas xornadas dedicadas a Frei Martín Sarmiento, conmemorando o 278º aniversario da súa visita á vila en setembro de 1745.
As xornadas comezarán o venres, 13 de setembro, ás 20:00 horas no Casal de Ferreirós, cunha charla a cargo do doutor en Filosofía Marcelino Agís, catedrático da Universidade de Santiago e autor de distintas publicacións sobre Sarmiento.
A conferencia permitirá achegarse á figura do frade como estudoso e viaxeiro, destacando a súa contribución á ciencia e á cultura popular galega.
O sábado 14, a partir das 10:30 horas, realizarase unha visita guiada á Illa de Tambo, durante a que se repasarán in situ as anotacións realizadas polo frade no seu diario de viaxe hai case 300 anos.
Ao rematar o percorrido, descubrirase un recordatorio conmemorando a visita de Sarmiento á Illa. A inscrición para esta viaxe xa está pechada, ao completarse o cupo diario de visitas á Illa.
Desde o Concello de Poio entenden estas xornadas como unha maneira inmellorable de homenaxear a figura do Padre Sarmiento, salientando o seu legado como un dos grandes estudosos e defensores da cultura galega.
Ao mesmo tempo, poñen en valor "o inmenso papel na historia da Illa de Tambo, que cada vez temos máis motivos para reivindicar como un referente natural, cultural e de turismo sostible".
"Onde se non podemos desfrutar dunha visita na que nos guiará 'persoalmente', mediante as súas anotacións persoais, por unha figura de tanta relevancia histórica como o Padre Sarmiento?", indicaba o alcalde de Poio, Ángel Moldes, durante a presentación.