Convocada a hostalaría a unha reunión de coordinación para o San Migheleiro
Por Redacción
O Concello de Marín convoca á hostalaría da vila a unha reunión de coordinación para organizar o San Migheleiro, unha das festas máis populares do municipio, que se celebrará o vindeiro sábado, 28 de setembro.
A reunión terá lugar o venres, 6 de setembro, ás 10.30 horas no salón de plenos do Concello de Marín.
O San Migheleiro é unha tradición que naceu da iniciativa dos locais de hostalaría da vila e que se consolidou como unha cita imprescindíble no calendario festivo de Marín.
A reunión convocada polo Concello pretende coñecer de primeira man os detalles da Ruta dos bares que conforman o evento, así como as actividades específicas que organizará cada establecemento participante.
Ademais da coordinación entre os locais, o Concello tamén planificará o dispositivo de limpeza para garantir que as rúas da vila queden en perfecto estado ao día seguinte, o 29 de setembro, cando se celebra o Día de San Miguel, acompañado da tradicional Danza das Espadas.
A axenda festiva de Marín en setembro complétase con outros eventos importantes, como as festas da patroa, que terán lugar esta fin de semana.