Carmen Senra Carreiro celebra o seu centenario con moi bo humor
Por Anxo Lourido
Cun século ás súas costas, Mª Carmen Senra Carreiro celebraba este luns ,acompañada por algúns dos seus familiares, un aniversario moi especial.
Esta muller, que sempre se caracterizou por ser moi activa, naceu en Gaxate, no Concello da Lama, en 1924.
Veu á capital da provincia para estudar no Instituto de Pontevedra onde coñeceu ao que sería o seu marido, José Márquez.
Foi a única dos seus irmáns que permaneceu en Galicia, o resto emigrou a Brasil cos pais, mentres ela quedaba en Pontevedra residindo cos seus avós.
Co paso dos anos, Carmen Senra e José Márquez crearon a granxa de San Amaro onde criaban polos.
Fixéronse coñecidos polo establecemento que tiñan en Cobián Roffignac onde vendían os polos cociñados.
O establecemento pasou a converterse en Comercial La Granja, onde se vendía material de semente e para o gando.
Carmen Senra sempre foi viaxeira e co seu marido realizaban rutinas como estiramentos e abdominais todas as mañás ou natación na piscina, ademais de ir case todos os anos esquiar.
Tivo tres fillos, sete netos e cinco bisnetos.
Na xornada do domingo, toda a familia, mesmo chegados de Brasil, acompañaron a Carmen na súa festividade.
Este luns, o alcalde de Pontevedra tamén foi felicitala e sorprendíase polo bo humor e a locuacidade desta centenaria pontevedresa, quen lle lembraba a Miguel Anxo Fernández Lores que fora o seu médico de cabeceira décadas atrás.
Tras a celebración, o alcalde e Carmen Senra comprometéronse a volver verse dentro dun ano por estas mesmas datas.