Operativo para rescatar unha persoa ferida tras esvarar na zona do antigo balneario do Lérez
![María José](/web/cache/scene/uploads/xornalistas/foto/377/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/5ea3331f09-foto-posible-para-linkedin-02.jpg)
Por María José Pita
![](/web/cache/scene/uploads/fotos/foto/7dc/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/66bdbf01ca-455693401_998354502086384_313196141046639421_n.jpg)
© Mikel Aramburu
![](/web/cache/scene/uploads/fotos/foto/66f/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/66bdbfb7ec-454617652_472600345566766_1291728140671720116_n.jpg)
© Mikel Aramburu
A Axencia Galega de Emerxencias informa que ás 10:30 da mañá deste mércores 14 agosto o teléfono 112 de Emerxencias Galicia recibía a chamada dun home pedindo axuda tras sufrir unha caída mentres paseaba pola senda xunto ao río Lérez, en Pontevedra.
En concreto, o afectado estaba a camiñar pola pasarela peonil situada na zona do antigo balneario de Lérez cando esvarou e precipitouse xunto ao leito do río.
Segundo o 112, o home apenas puido explicar que sucedeu, simplemente que tiña unha posible rotura de tibia e peroné e necesitaba asistencia médica urxente.
A cuestión que se lle presentaba aos servizos de emerxencia era como podería acceder a asistencia sanitaria ao lugar no que se atopaba, un carreiro sen asfaltar. Por iso, dende o 112 Galicia pediuse a colaboración dos Bombeiros de Pontevedra, que portaron o ferido ata o lugar onde esperaba a ambulancia de Urxencias Sanitarias de Galicia-061.
Paralelamente á chamada do propio afectado, produciuse outra comunicación ao 112 Galicia. Tratábase dunhas persoas que escoitaron un golpe e seguidamente un home pedindo auxilio.
Con toda esta información, púxose en marcha o operativo de rescate conformado por unha dotación de sanitarios e bombeiros, que percorreron un longo treito para trasladar ao ferido ata a ambulancia. Tamén colaboraron os axentes da Policía Local e voluntarios de Protección Civil da cidade.
Despois de recibir os coidados necesarios, foi evacuado ao Hospital de Montecelo, en Pontevedra.
A intervención dos bombeiros finalizou pasado o mediodía.