María Vinyals, protagonista do próximo desafío Eureka Reto Rural no Castelo de Soutomaior
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Xunta e Concello de Soutomaior veñen de presentar a penúltima das actividades do desafío Eureka Reto Rural que se organiza xunto co Xeodestino Ría de Vigo e Baixo Miño. María Vinyals, escritora e precursora do feminismo en Galicia, será a protagonista deste scape room que se desenvolverá con dúas particularidades engadidas: o emprazamento, o Castelo de Soutomaior, que foi o seu lugar de nacemento e o 14 de agosto, data en que naceu.
A iniciativa é unha forma orixinal de coñecer a súa historia superando retos. É gratuíta e está dirixida a todas as idades, aínda que os menores de doce anos deben ir acompañados dunha persoa adulta. O equipo gañador obterá unha visita guiada, con cata de viños e tapas, a unha adega da zona do Rosal. Ademais o Concello de Soutomaior sorteará entre o participantes tres cestas de produtos locais.
Comezará ás 11.00 horas e requírese inscrición previa na web do Xeodestino Ría de Vigo e Baixo Miño. A proposta ten un engadido en liña, xa que o scape room estará aberto ao público nesa mesma web durante un mes.
A presidenta de EuRural, Sandra González, animaba a participar nesta proposta "coa que nos mergullamos de pleno no verán con novos desafíos ao aire libre, cos que coñecer novos recunchos do noso territorio, así como a historia e a tradición dos concellos que forman parte del". Silvia Cernadas, concelleira de Turismo en Soutomaior, engadía que "o obxectivo fundamental é o de conmemorar a figura de María Vinyals con motivo do seu nacemento o 14 de agosto de 1875 no Castillo de Soutomaior".
A última das propostas organizadas está fixada para o 20 de setembro en Redondela sobre 'A historia da nosa vila'.
Relacionadas:
-
Punkativada volve coa súa segunda edición á Carballeira do Peirao de Arcade
Por Redacción |
-
Petición a Correos dun selo conmemorativo polo aniversario do nacemento da feminista María Vinyals
Por Redacción |
-
Reivindican "ferramentas" para que as mulleres poidan acceder "á metade do ceo"
Por Redacción |
-
Quince recoñecidas expertas participarán no III Encontro Nacional sobre Políticas Públicas da Escola María Vinyals
Por Oskar Viéitez |