Sacan pola xanela unha muller que bateu contra unha casa e quedou atrapada nun turismo envorcado
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Os Bombeiros do Salnés e os membros do GES de Sanxenxo tiveron que intervir de madrugada para a excarceración da condutora dun turismo que tivo un accidente en Meaño.
O accidente rexistrouse sobre as 2.30 horas na estrada PO-550, ao seu paso por Coirón, en Meaño.
Segundo a información á que tivo acceso o 112 Galicia, o turismo saíuse da vía, bateu contra unha casa e quedou completamente envorcado.
A muller que ía no interior quedou atrapada, polo que foi necesaria a intervención para poder sacala pola xanela.
Unha das persoas que chamou ao 112 para solicitar a intervención dos medios e recursos necesarios indicou que o coche resultou bastante danado pola parte dianteira, pero, con todo, a condutora parecía ter lesións pouco importantes.
Iso si, quedou atrapada no interior e debían actuar os equipos de rescate. Despois, unha vez liberada, foi evacuada por unha dotación de Urxencias Sanitarias de Galicia-061 ao centro hospitalario de referencia.
No operativo tamén colaboraron os axentes da Garda Civil de Tráfico.