Os traballadores alcanzan un acordo con Froiz para mellorar as condicións salariais do persoal do almacén do Marco
Por Oskar Viéitez
A asemblea de traballadores da plataforma loxística que Froiz ten no Marco aprobou o preacordo acadado no día de onte entre a representación sindical e a empresa, para a creación de pluses vinculados ás distintas categorías.
A ratificación do acordo supón a desconvocatoria da concentración deste venres no almacén de Lourido e das tres xornadas de folga previstas para a próxima semana.
O secretario da CIG-Servizos de Pontevedra, Iván Veiga, explica que con este acordo recóllese a incorporación de pluses para cada un dos tres colectivos laborais, o que suporá que o persoal perciba de 100 ao 200 euros máis ao mes nas súas nóminas.
Para o persoal separador/preparador de mercadorías créase un complemento de produtividade que vai dos 60 aos 200 euros; para o persoal carretilleiro estabelécese un plus fixo de posto de 120 euros; e para o persoal tranportista un complemento de 100 euros.
Veiga subliña que estas melloras que xa tiñan noutros almacéns están por enriba do convenio colectivo.
Esta diferencia salarial remóntase ao ano 2020 coa adquisición por parte de Froiz das instalacións que pertencían á cadea de supermercados Moldes. Tras da compra, Froiz subrogou o cadro de persoal manténdolle as condicións que traian, sen aplicarlle complementos salariais que xa tiña o persoal da plataforma de Lourido, a escasos quilómetros e na que se realizan as mesmas funcións que no Marco.