Agárdanse chuvias intensas este martes nunha semana con temperaturas por debaixo de 25 graos nas Rías Baixas
Por Redacción
Este luns 8 de xullo pérdese a influencia das altas presións en Galicia e, por tanto, os ceos irán aparecendo máis nubrados en toda a zona oeste. As choivas entrarán polas Rías Baixas a partir da tarde e faranse xeneralizadas en toda a comunidade durante a noite. As temperaturas moveranse entre os 13 e os 25 graos na provincia de Pontevedra. O vento soprará de compoñente sur, frouxo con intervalos moderados en terra; e moderado no mar, segundo o servizo de Meteogalicia.
Durante o martes 9 presentarase unha fronte activa. A mañá presentará ceos nubrados con choivas, frecuentes e intensas na fachada atlántica. Durante a tarde serán máis xeneralizadas. As temperaturas oscilarán entre os 17 e os 23 graos. O vento soprará do suroeste con intervalos moderados.
O mércores continúa a influencia das baixas presións e con circulación de vento do oeste. O día iniciarase con ceos moi nubrados e algunha choiva débil. A tendencia durante a tarde será de desaparición dos chuvascos. As temperaturas presentarán mínimas de 16 graos e máximas de 24.
As altas presións comezarán a partir do xoves a moverse cara ao norte. Desta forma, irá rebaixándose a probabilidade de precipitacións coa chegada da fin de semana. Nas Rías Baixas as temperaturas mínimas baixarán aos 12 graos mentres que as máximas alcanzarán os 25.