O estaleiro de Purro e a súa bandeira azul, punto de partida das rutas Coñece Bueu
Por Redacción
O estaleiro de Purro, na Banda do Río, acolleu este xoves o acto simbólico de izado da bandeira azul que conseguiu este ano por primeira vez e que serviu ao mesmo tempo para presentar as rutas guiadas patrimoniais que, baixo o nome de Coñece Bueu, se organizarán este verán.
O alcalde de Bueu, Félix Juncal, destacou que o distintivo para esta carpintería de ribeira "é unha recompensa a todo o traballo de recuperación do patrimonio desta vila, así como de rescatar do esquecemento unha parte da nosa historia e identidade".
Ese mesmo espírito teñen as rutas patrimoniais deseñadas para a posta en valor da historia mariñeira, "co obxectivo de difundir a nosa historia tanto á cidadanía local como ás persoas visitantes que se acheguen a Bueu", explicou a edil de Turismo, Silvia Carballo.
O programa comezará o próximo 14 de xullo e iranse alternando diversas rutas temáticas, que se desenvolverán todos os venres ata a primeira quincena de setembro a partir das 10 horas.
A primeira delas leva por título "Bueu sabor e mar" e continúa as xa comezadas no verán do 2021, que contaron nestes anos cunha gran acollida por parte das persoas participantes.
Nela faise un percorrido pola contorna urbana e polos espazos que constrúen o pasado e o presente da pesca en Bueu, rematando coa degustación dun petisco na praza de abastos elaborado por unha cociñeira local con produtos mariñeiros da mesma praza.
A seguinte das rutas é "O mar: fonte de alimento e de traballo" e irá dende a zona de Pescadoira ata o Centro de Interpretación do Litoral en Agrelo. E a última, "Carpintería de ribeira: o patrimonio cultural" buscará contar a historia do estaleiro de Purro.
Para participar en todas estas rutas precísase inscrición previa na Oficina de Turismo de Bueu, no enderezo electrónico turismo@concellodebueu.gal, ou no teléfono 986390029 (ext.5).
As prazas están limitadas a un máximo de quince persoas por cada día e serán de balde.