Lecturas de verán para estimular a linguaxe na poboación infantil
O Servizo de Pediatría e a Unidade de Logopedia Infantil do Hospital Quirónsalud Miguel Domínguez elaborarou un mapa de lecturas por idades e recomendacións para a poboación infantil durante os meses de verán. A iniciativa dá resposta a unha preocupación habitual nas familias que solicitan axuda para promover hábitos de lectura e estimulación da linguaxe.
A Dra. Mónica Camaño, médico pediatra, lembra que entre os 0 e os 6 anos "o cerebro ten o maior período de elasticidade e deberiamos aproveitar para fomentar a aprendizaxe, promover hábitos de lectura e reducir os trastornos da linguaxe".
Os nenos e nenas seguen o exemplo do que ven na casa; por iso recomenda "dedicar tempo a ler con eles, que vexan que nós lemos e explicarlles por que nos gusta ler". A especialista apunta que coñecer os seus gustos é moi importante. "Temos que atopar o seu punto débil, recomendar lecturas e deixarlles elixir". Por último, propón crear espazos de lectura.
A poboación infantil entre 2-3 anos exposta a pantallas terá un maior risco de padecer un atraso na linguaxe, segundo demostraron diversos estudos. Eugenia Blanco, coordinadora da Unidade de Logopedia infantil, explica que "están a deixar de recibir estímulos sensoriais primordiais na infancia e enfróntanse a unha sobreestimulación de pantallas para a que o cerebro non está preparado, chegando mesmo a provocar un atraso na capacidade de aprendizaxe".
MAPA DE LECTURAS POR IDADES
Ler aos bebés (6-12 meses) estimula a súa imaxinación e estreita vínculos entre proxenitores e fillos. Libros para o baño, de tea, con texturas, con sons e con cores moi vistosas ou contos para lerlle cantando son os máis atractivos.
De 12 a 18 meses os contos de pop-ups e de pestanas promoven a interacción, fomentan a imaxinación e a creatividade e estimulan a psicomotricidade.
A partir dos 18 meses e ata os dous anos os libros deben ser historias breves, cunha estrutura de inicio-nó-desenlace. É recomendable ler moitas veces o mesmo libro para afianzar conceptos e anticipar o que vai pasar.
Na seguinte etapa, de 2 a 3 anos, os contos deben ter moitas imaxes para favorecer a expresión formando frases onde o lector se transforme en narrador.
De 3 a 4 anos, o conto debe servir para consolidar e enriquecer o vocabulario, promovendo a dicción, a linguaxe e a conversación. Recoméndanse libros con maiúsculas que favorecen o recoñecemento das palabras.
Por último, de 4 a 6 anos os contos para nenos e nenas deben ter en conta os seus intereses, para fomentar a aprendizaxe e afianzar o hábito lector.
SOBRE QUIRÓNSALUD
Quirónsalud é o grupo de saúde líder en España e, xunto coa súa matriz Fresenius-Helios, tamén en Europa. Ademais da súa actividade en España, Quirónsalud está tamén presente en Latinoamérica. Conxuntamente, conta con máis de 50.000 profesionais en máis de 180 centros sanitarios, entre os que se atopan 59 hospitais con máis de 8.000 camas hospitalarias. Dispón da tecnoloxía máis avanzada e dun gran equipo de profesionais altamente especializado e de prestixio internacional. Entre os seus centros, atópanse o Hospital Universitario Fundación Jiménez Díaz, Centro Médico Teknon, Ruber Internacional, Hospital Universitario Quirónsalud Madrid, Hospital Quirónsalud Barcelona, Hospital Universitario Dexeus, Policlínica Gipuzkoa, Hospital Universitari General de Catalunya, Hospital Quirónsalud Sagrado Corazón, etc.
O Grupo traballa na promoción da docencia (dez dos seus hospitais son universitarios) e a investigación médico-científica (conta co Instituto de Investigación Sanitaria da FJD, acreditado polo Ministerio de Ciencia e Innovación).
Así mesmo, o seu servizo asistencial está organizado en unidades e redes transversais que permiten optimizar a experiencia acumulada nos distintos centros e a translación clínica das súas investigacións. Actualmente, Quirónsalud está a desenvolver multitude de proxectos de investigación en toda España e moitos dos seus centros realizan neste ámbito un labor punteiro, sendo pioneiros en diferentes especialidades como oncoloxía, cardioloxía, endocrinoloxía, xinecoloxía e neuroloxía, entre outras.