Luz verde á instalación dunha gasolineira de baixo custo na Avenida de Lugo
Por Alejandro Espiño
Nunha parcela de 1.463 metros cadrados, situada xusto á beira do McDonald's da Avenida de Lugo, situarase a nova gasolineira de baixo custo que a compañía Petroprix Enerxía, unha das principais empresas do sector, abrirá en Pontevedra.
Será a primeira estación de servizo que Petroprix, que ten unha rede dunhas 120 gasolineiras en todo o territorio nacional, terá no municipio pontevedrés. Na provincia conta con catro centros de reposición, un deles na PO-531, na recta da Goulla (Meis).
Os técnicos municipais avalaron que os terreos elixidos para a instalación desta gasolineira contan cos requisitos normativos necesarios para equipamentos destas características, polo que o Concello lles dará licenza na próxima Xunta de Goberno.
O edil de Urbanismo, Alberto Oubiña, sostivo que os informes técnicos "consideran xustificado o uso industrial pretendido", ao ser compatible co ordenamento da zona.
Esta gasolineira contará ademais cun servizo de lavado de coches.
Unha vez reciba a correspondente licenza, Petroprix terá dous anos para completar a construción desta estación de servizo, na que investirá uns 128.000 euros.
Ademais, outros 36.000 euros destinaranse á urbanización da parcela, xa que entre outras cousas deberán modificar o trazado das beirarrúas e ampliar os accesos.