O Parador, o Teatro Principal e a igrexa San Bartolomeu, novo "patrimonio invisible" a descubrir
Por Alejandro Espiño
Tras un ano de descanso, volve a Pontevedra a Semana do Patrimonio Invisible, un programa de visitas guiadas que abre as portas de espazos agochados ou pouco descubertos e de tesouros artísticos e históricos que, habitualmente, non son accesibles para o público.
Nesta ocasión serán seis os lugares que visitarán os participantes nesta iniciativa, que se desenvolverá entre los días 11 e 14 de xullo.
Tres serán os espazos que se incorporan a este programa por vez primeira e que segundo explicou Manuel Rial, o coordinador destas visitas, "parecen pouco invisibles" pero nos que os asistentes poderán coñecer "as cousas que non se ven".
Serán o Parador de Pontevedra, no que se visitarán estancias "que non coñecen nin os propios clientes"; o Teatro Principal, que revelará o seu vello cinematógrafo; ou a igrexa de San Bartolomeu, entrando mesmo na sancristía e nos lugares que gardan a súa colección artística.
As outras tres paradas serán espazos xa visitados nos tres anos anteriores e que repiten debido á alta demanda que xeraron no seu día.
Dentro delas están o Pazo de Gandarón, sede da Misión Biolóxica de Galicia; os xardíns do Pazo de Lourizán e o mosteiro de San Salvador de Lérez, este último xusto nos días posteriores á celebración da grande romaría de San Bieito.
Todas estas visitas guiadas precisarán de reserva a través dun formulario en liña que se habilitará o vindeiro 8 de xullo, ás 12.00 horas, na páxina www.patrimonioinvisible.gal.
As prazas para cada quenda de visitas son limitadas, xa que serán grupos reducidos de quince persoas por cada sesión para que a experiencia, segundo os seus responsables, sexa "gratificante e de alta calidade". As visitas son de carácter gratuíto.
Co fin de garantir o acceso á actividade ao maior número de persoas, cada solicitante só poderá reservar un máximo de tres visitas para dúas persoas.
Manuel Rial indicou que estas visitas, polas súas características, "non están pensadas para os turistas", senón para a veciñanza da cidade, xa que se busca "facer visible" o seu patrimonio.