O PP de Pontevedra fai balance de "un ano fantástico e prometedor"
Por Redacción
O PP local de Pontevedra celebrou reunións do Comité Executivo e da Xunta Directiva para facer balance de "un ano fantástico e prometedor" na cidade.
O presidente do Partido Popular de Pontevedra, Rafa Domínguez, convocou os encontros e asegurou que, tras a súa celebración, puido notar "a ilusión de todos os membros do Comité Executivo e da Xunta Directiva polos éxitos electorais que obtivemos".
Así, lembrou que o PP de Pontevedra gañou as tres citas electorais que se celebraron desde as municipais de maio de 2023. Citou a maioría absoluta de Alfonso Rueda nas eleccións autonómicas, que o PP recuperou a Deputación Provincial e que gañaron as eleccións europeas.
As tres citas electorais supoñen "un voto de confianza enorme dos cidadáns, aos que responderemos con traballo, esixíndonos cada día máis" e Domínguez lembra que nas municipais de 2023 logro o sorpasso ao BNG e que a vitoria na cidade do Lérez, sumada aos bos resultados cultivados pola formación azul no resto da provincia, permitiron recuperar a Deputación.
Como vicepresidente da Deputación e portavoz municipal do PP, Domínguez apelou á política do "sentidiño" e da "xestión responsable" de Alfonso Rueda para procurar mellorar a vida de todos os pontevedreses desde as súas competencias provinciais e como líder da oposición no Concello de Pontevedra.
Ademais, expresou a súa satisfacción polo desempeño dos 11 concelleiros da corporación municipal e agradeceu que "cada vez se incorporen máis cidadáns ao noso partido e concepto político".