Recadan máis de 37.000 quilos de alimentos no Maio Solidario de Gadis
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O Maio Solidario, campaña organizada por Gadis para colaborar coa Fundación Provincial Banco de Alimentos logrou máis de 37.000 quilos de comida.
Esta cantidade procede das distintas tendas que apoiaron esta acción na provincia, da achega realizada pola cadea de alimentación Gadis e doutras doazóns económicas depositadas nos establecementos ao pasar os clientes por caixa.
A cifra supón un descenso en 5.000 quilos respecto a os obtidos no Maio Solidario de 2023. O motivo segundo o Banco de Alimentos débese á subida dos prezos nos produtos máis básicos.
Iván Martínez, presidente da entidade solidaria, recoñecía que "sabemos que a situación actual é máis que complicada. Que a sociedade continúe poñéndose na pel das persoas máis vulnerables emociónanos e impúlsanos a seguir adiante afrontando todos os retos que temos por diante".
Gadis leva 12 anos, de maneira continuada, organizando o Maio Solidario a favor dos Bancos de Alimentos de Galicia e Castela e León.
Máis de seiscentas persoas voluntarias participaron nesta Operación Quilo desenvolta en máis de trinta establecementos Gadis en puntos como Pontevedra, Vigo, Marín, Bueu, Cambados, Vilagarcía, Nigrán, Mos, Ponteareas, Lalín e Tui.
Os 37.000 quilos de alimentos supoñen un gran apoio para o colectivo porque neste 2024 o Banco de Alimentos deixou de recibir o Fondo Europeo de Axuda ás Persoas Máis Desfavorecidas (FEAD), que en 2023 outorgara 500.000 quilos de comida á organización solidaria.
Este ano, o FEAD é substituído polo Fondo Social Europeo Plus, un programa que xestiona en exclusiva a Cruz Vermella, a través de tarxetas moedeiro.
A Fundación Provincial Banco de Alimentos lembra que en 2023 repartiu máis de 1,9 millóns de quilos de alimentos básicos e atende a máis de 20.000 persoas en situación de vulnerabilidade dentro da provincia de Pontevedra coa colaboración de máis de 150 ONG's e outras entidades homologadas.