Escenarios incertos sobre o tempo co que empeza o verán
Por Oskar Viéitez
"Escenarios incertos para a derradeira semana deste mes de xuño na Península cunha posible entrada de aire cálido ou de aire frío en altura con subida ou baixada das temperaturas. Polo tanto, agardamos predicións moi cambiantes". Este foi o desconcertante prognóstico de MeteoGalicia para este xoves 20 de xuño, xornada na que comeza o verán astronómico.
O xoves Galicia queda nunha situación intermedia entre as altas presións situadas no Atlántico e as baixas presións do leste peninsular. Esta configuración deixa un corredor de ventos do norte que traerán nubes baixas durante a mañá, con chuvias na provincia da Coruña e metade norte da provincia de Lugo. A partir do mediodía os ceos quedarán parcialmente cubertos, con chuvascos máis probables na metade leste. As temperaturas mínimas non terán cambios significativos mentres que as máximas sufrirán lixeiros descensos. O vento soprará frouxo de compoñente norte, con intervalos moderados no mar.
Durante o venres, Galicia irá quedando progresivamente baixo influencia anticiclónica. Con esta situación, comezaremos a xornada con nubes baixas e co avance do día os ceos quedarán pouco nubrados ou despexados, con intervalos de nubes de tipo alto. As temperaturas mínimas non experimentarán cambios, mentres que as máximas terán un lixeiro ascenso. Os ventos soprarán do noroeste, frouxos en xeral, moderados no litoral norte.
O sábado Galicia quedará na influencia das altas presións, con ventos de compoñente oeste. Así, comezaremos a xornada cos ceos cubertos, mesmo coa posibilidade dalgún orballo no litoral. A partir do mediodía os ceos quedarán con apertura de grandes claros. As temperaturas mínimas non terán cambios significativos mentres que as máximas experimentarán un lixeiro ascenso. O vento soprará frouxo de compoñente oeste.
Esta semana rematará con aumento da influencia anticiclónica sobre Galicia, que se irá perdendo a mediados da vindeira semana. As temperaturas máximas ascenderán neste período, quedando as mínimas un pouco baixas para a época do ano.