Sen ruído nas atraccións de feira do San Xoán de Poio para adaptalas ás persoas con autismo
Por Oskar Viéitez
Nas Festas de San Xoán de Poio todos os días silenciaranse as atraccións de feira para que as persoas con Trastorno do Espectro Autista (TEA) poidan disfrutar delas.
Desde a concellería de Festexos, o edil Fran Dasilva, explica que a hipersensibilidade auditiva provócalles que os ruídos fortes lles afecten moito máis, ata o punto de converterse nunha barreira importante que lles impide gozar destas atraccións.
Por iso, o goberno local volveu falar cos responsables das atraccións para que este ano se incrementen como mínimo a dúas horas diarias -unha máis que o ano pasado- o funcionamento das atraccións sen son e, deste xeito, garantir que ningunha persoa con autismo teña problemas para acceder a elas.
Ademais, os nenos volverán a ter unha festa dedicada para eles dentro da programación do San Xoán, o xoves 27, con inchables gratuítos, escuma e a animación de Javi Solla, que este ano se completarán cunha redución do 50% no prezo das atraccións que continúen no recito da festa ese día.
O San Xoán comeza este sábado, 22 de xuño e ten por diante seis días de celebración para ofrecer unha festa participativa e con propostas atractivas para todos os públicos.
A programación comeza o sábado 22, coa lectura do pregón de Rafa Cabeleira, a entrega dos premios aos mellores deportistas desta tempada e a actuación do Trío Arena para recordar as festas do Campillo. A sardiñada popular, o espectáculo de lume e prendido da fogueira será o domingo 23. A Seca acollerá as actuacións dalgunhas das mellores orquestras galegas para amenizar as veladas nocturnas, como Panorama, Kubo, Los Players, Capitol, Miramar, Gran Parada e Marbella.