Rematan as actividades de primavera de "O monte é teu" pero aínda quedan as "Ponteandadas"
Por Oskar Viéitez
Este sábado tivo lugar a actividade "Observando Macroinvertebrados. Os pequenos habitantes dos ríos".
Tratouse dunha das actividades organizadas pola Concellaría de Montes do Concello de Pontevedra, que xestiona María José Abilleira, dentro do programa "O monte é teu" para coñecer e gozar dos parques forestais do concello: Pontillón do Castro, A Fracha e A Tomba, e poñer en valor este anel verde perimetral da cidade.
As persoas participantes este sábado aprenderon sobre os ecosistemas acuáticos de auga doce e coñeceron aos habitantes máis pequenos dos nosos ríos como son os macroinvertebrados acuáticos. Estes animais, moitas veces descoñecidos, son fundamentais para o ecosistema e ademais permítennos avaliar o estado de saúde dun río.
Tamén este sábado na Fracha desenvolveuse a actividade "A natureza como espazo creativo" na que cada participante recibiu un caderno onde plasmou o que observaba na contorna facendo fincapé na cor ou nas formas.
Tratouse de vivir o espazo natural dunha maneira diferente á habitual.
Con estas dúas actividades púxose fin a todas as propostas para esta primavera de "O monte é teu" pero aínda están en marcha outras como as Ponteandadas, este mesmo domingo tivo lugar a andaina entre O Salgueiral e Bora e para o vindeiro domingo 30 de xuño está prevista a "PonteAndada Montuna - Monte Carrasco".
Singular é a camiñada prevista para o sábado 14 de setembro que será unha "PonteAndada Nocturna" cun percorrido semi urbano, pois sairá ás oito da tarde desde o Palco da Música da Alameda tras impartir unhas nocións básicas de iniciación á marcha nórdica. Esta será un roteiro con dificultade baixa para completar nunhas 2 horas.
De novo co esquema habitual (quedada ás 9.30 horas, quecemento con zumba, dificultade baixa e tres horas de marcha) prográmanse a "PonteAndada do Magosto - A Meán (Lérez)", para o domingo 20 de octubro con saída desde o Pavillón Municipal de Deportes; a "PonteAndada do cogomelo" para o domingo 17 de novembro atravesando os terreos de Tafisa ata chegar a Mourente e cunha charla sobre cogomelos incluída e a "PonteAndada solidaria de inverno", que será o domingo 15 de decembro por Salcedo e San Brais con saída do Pavillón de Cabanas e que inclúe un donativo por parte das persoas participantes de produtos non perecedoiros para o Banco de Alimentos.
As inscricións téñense que facer no correo electrónico ponteandadas@gmail.com ou no teléfono 625 482 636 ou presencialmente na tenda "Naturcamiña" nas Galerías Peregrina, número 3. Por participar na camiñada hai que pagar 2 euros para o seguro.