Crepes e espetadas de froita, as deliciosas receitas dos pequenos cociñeiros do colexio Campolongo
Por Mónica Patxot & María José Pita
Os escolares de 1º e 2º de Primaria do CEP Campolongo de Pontevedra participaron este venres en "Horta Chef", unha actividade organizada pola ANPA (Asociación de Nais e Pais San Xosé) do centro.
Todo o alumnado do colexio Campolongo, que abarca de 1º a 6º de Primaria, intervén nesta serie de xornadas gastronómicas, nas que cociñeiros da zona elaboran unha receita sinxela cos alumnos de cada curso.
Esta actividade empezaba o pasado mércores, coa participación de Bibiana Cardona e Gabi, do Restaurante 5 Puertas, e Alberto Sobral, de Caralludo by Chuchi, que cociñaron con escolares de 3º e 5º de Primaria.
A xornada deste venres estivo protagonizada polos chefs Raúl Facciola, de Cre-cotte, e Laura e Carolina García, de Pontetapas. Pechará este ciclo, o vindeiro mércores 19, Francesco Iannelli, de Il Piccolo, e Andrés Virgós e Jaime González, de Gumer.
Todos estes restaurantes están situados na cidade de Pontevedra, salvo Caralludo by Chuchi, que se atopa en Meaño. Iria Asorey, a vicepresidenta da ANPA foi a encargada de contactar con estes profesionais. Recoñece que desde o primeiro momento todo foron facilidades. Mesmo cando lles preguntaron que produtos necesitaban que comprase a asociación para elaborar as receitas, dixeron que non facía falta, que xa o traían eles todo.
Tamén lles comentaron que había algúns nenos con intolerancias alimentarias, e para eles trouxeron ingredientes alternativos, como, por exemplo, leites sen lactosa. A maiores, desde a ANPA manexaban unha lista detallada daqueles pequenos con outras intolerancias e alerxias, para que todos tivesen a oportunidade de participar na preparación e degustación das receitas.
Coordinando a "Horta Chef" atopábase a secretaria da ANPA, Maria Rodríguez, quen explica que esta xornada gastronómica é o peche, por este curso, da "Horta Viaxeira", unha actividade que desenvolve a asociación de nais e pais durante todo o ano nun horto que plantan na zona do río dos Gafos, e do que se fan cargo as propias familias do alumnado do centro.
RECEITAS PARA CHUCHAR OS DEDOS
O día estivo cargado de anécdotas. Raúl Facciola, de Cree-cotte, destaca a fascinación coa que os nenos vían como unha masa líquida convertíase nunha crepe. Preguntaban polos buraquiños que se formaban unha vez estendida no ferro ou por que cambiaba de cor. Pacientemente contáballes que iso significaba que a tortiña estaba a acabarse de facer. A emoción creceu cando o cociñeiro lles cedeu a espátula para que eles mesmos volteasen a crepe e finalmente a retirasen ao prato.
No outro espazo de cociña, Laura e Carolina García, de Pontetapas, propoñían unhas espetadas de froitas variadas, na que cada neno escollía as variedades que máis lle gustaban, montábanas no pau e recubríanas de chocolate. Confesa Laura que se sorprendeu coa destreza de varios dos participantes que, con tan curta idade, mostráronlle como troceaban a froita eles mesmos na súa casa.
Destaca a chef que este tipo de actividades son moi boas para que os nenos gocen coa froita. Salvo un neno que se plantou e dixo que só comía plátano, comenta entre risas, o resto montaron as súas espetadas con pezas variadas, mesmo varios deles preguntáronlle polo nome dalgunha froita que non coñecían e que lles apetecía probar, como así fixeron.
As elaboracións baseábanse en produtos saudables aínda que, como admitiron todos os chefs participantes cun sorriso, o produto que máis éxito tivo foi o chocolate, tanto de recheo dalgunhas crepes como para a cobertura das espetadas de froitas.
Relacionadas:
-
Máis de 150 docentes debaten en Pontevedra sobre a creación de espazos inclusivos nos centros educativos
Por Redacción |
-
Un 'horta chef' para que o alumnado de Campolongo coma saudable e "colla o gusto pola cociña"
Por Natalia Puga & Mónica Patxot |
-
Da horta á mesa para aprender a facer a súa propia pizza saudable
Por Mónica Patxot & Natalia Puga |