Activan o pago con Bizum e con tarxeta para abonar as taxas do ORAL
Por Redacción
O departamento do ORAL, responsable da xestión tributaria e a recadación dos recursos locais, adáptase aos tempos facilitando o pago dos tributos municipais xestionados por conta dos Concellos delegados a este organismo pertenciente á Deputación.
Alejandro Lorenzo, deputado provincial de Xestión Tributaria, anunciaba esta medida durante a inauguración da xornada 'A Administración cada vez máis preto', que a Deputación celebraba no Pazo Provincial en colaboración coa Xerencia Territorial do Catastro de Pontevedra.
Explicaba que o ORAL activou Bizum como unha nova forma para realizar o pago dos tributos non domiciliados a través da Oficina Virtual Tributaria e tamén, nas oficinas de atención presencial, a opción de realizar o pago de impostos e taxas municipais con tarxeta de crédito ou débito, a través da colaboración do persoal funcionario deste servizo.
Segundo manifestaba o deputado, esta medida amplía os lugares onde pagar os tributos municipais dos concellos e entes que os teñen delegados á Deputación, ofrecendo a opción de pagar en todas as sucursais das entidades bancarias colaboradoras ou nas súas bancas electrónicas, do mesmo xeito que en calquera oficina de Correos, na Oficina Virtual Tributaria con tarxeta.
Precisamente anunciáronse solucións impulsadas desde o ORAL para ofrecer novas funcionalidades a través da Oficina Virtual Tributaria.
Micaela Martínez, xerente territorial do Catastro en Pontevedra, e Jesús Castillo, xerente territorial adxunto, tamén presentaba sistemas como CAPIDIC para que as persoas poidan ser atendidas por traballadores da Xerencia Territorial do Catastro vía vídeo chamada.
Ademais, presentaba unha aplicación móbil, CatasTRO, e un novo asistente virtual na Sede electrónica do Catastro, denominado CATIA.