A artista plástica Celeste Garrido, mención especial dos décimos premios Facendo Historia
Por Redacción
Os Premios Facendo Historia, enmarcados nas Xornadas Reencontro coa Historia de Marín, chegan á súa décima edición e, neste ano tan destacado, premiarán ao Ateneo Santa Cecilia, á Xunta Local da Asociación Española contra o Cancro (AECC) e á Mostra Camelias e Mar e darán unha mención especial para Celeste Garrido.
Esta iniciativa está promovida polo Club de Opinión Portocelo, co apoio do Concello de Marín. Na presentación participaron este xoves o seu promotor, Ángel García Carragal, acompañado polo tenente alcalde, Manuel Santos, e representantes dos premiados deste ano.
A gala de entrega será o domingo 7 de xullo no Salón de Plenos do Concello, cun acto aberto á cidadanía a partir das 12.00 horas. O acto contará coa participación da Banda de Música de Marín, dirixida por Eduardo González, que dará un concerto ao rematar o acto.
Carragal asegurou que estes premios supoñen "un acto de recoñecemento e afecto aos marinenses que veñen facendo historia dentro e fóra da nosa terra, vinculando o nome de Marín á súa exitosa traxectoria persoal e profesional no ámbito empresarial, cultural, deportivo, intelectual e mesmo político; así como a aqueles colectivos ou entidades públicas ou privadas que se comprometen e implican en resaltar e facer realidade a importancia cara o exterior do desenvolvemento social e económico do pobo marinense”.
Este ano recoñecen ao Ateneo Santa Cecilia, pola recuperación e organización do Enterro da Sardiña e a Danza de Espadas de San Miguel, eventos ambos declarados como Festa de Interese Turístico de Galicia.
No caso da Xunta Local de Marín da AECC, o premio é pola organización da Carreira Solidaria Montes e Praias.
Cristina Barreiro Pazos e María Rosa (Mara) Fariña Pérez saen premiadas como "apaixonadas coordinadoras" da Mostra Camelias e Mar, que anualmente celebra no Museo Municipal Manuel Torres a Sociedade Española da Camelia.
A mención especial é para a artista plástica Celeste Garrido Meira como coordinadora e mantedora da Mostra Voilá la Femme.