O PSOE quere ampliar o parque escultórico da Illa das Esculturas con novas artistas e ceder as obras ao Museo
Por Oskar Viéitez
O grupo municipal do Partido Socialista de Pontevedra levará a Pleno unha moción na que insta ao goberno local a ampliar a superficie do parque escultórico da Illa das Esculturas a medida que se vaia renaturalizando a ribeira do Lérez entre este espazo e a Xunqueira de Alba.
A moción foi presentada este xoves polos concelleiros Iván Puentes e Carmen Hermo.
A idea que defenden consiste en ir incrementando ano a ano, de acordo con outras administracións, o número de obras e "consolidar en Pontevedra o maior parque escultórico de Europa ao aire libre, con obras de referencia a nivel mundial mantendo o granito como elemento distintivo e resignificando este espazo privilexiado da cidade, dotándoo de valor cultural e patrimonial, non só natural".
A proposta do PSOE subliña a necesidade de crear unha comisión de expertos para a redacción do Plan Director da Illa das Esculturas, no que se recollerán as condicións de conservación de cada unha das pezas que compoñen esta colección, así coma os requisitos para a incorporación de máis esculturas de novos artistas, especialmente mulleres.
Carmen Hermo sinalou a necesidade de priorizar a obra de escultoras na adquisición de novas pezas, para equilibrar a actual situación, na que todas as esculturas, salvo os bancos de Jenny Holzer, son de autoría masculina.
Asemade os socialistas propoñen completar o proxecto orixinal da Illa das Esculturas, dotando do miradoiro planificado no seu día ao labirinto de Robert Morris, a fin de favorecer a súa vista desde arriba, e incorporando as tres pezas que faltan para chegar ás 15 inicialmente previstas.
Doutra banda, a iniciativa procura o inicio dos trámites para a realización dunha serie de actuacións para o coidado deste legado escultórico, entre as que se recolle a identificación in situ das pezas e os seus autores tanto con medios analóxicos e dixitais, coma a realidade aumentada; a conservación da vexetación, a programación dun mantemento anual de cada obra a cargo da Escola de Canteiros de Pontevedra, unha nova iluminación intelixente disuasoria, fomentar a edición de publicacións divulgativas e a programación de visitas -tanto escolares como profesionais-, así como a actualización e incorporación da información do parque escultórico nas páxinas web e redes sociais.
Por último, Hermo expuxo a posibilidade de estudar coa Deputación Provincial de Pontevedra e a Xunta de Galicia a cesión de todas as obras ao Museo de Pontevedra, como mellor garante, pola natureza da súa actividade e os recursos cos que conta, da súa correcta conservación e difusión; encargándose o Concello de Pontevedra do axeitado mantemento do espazo público.
Relacionadas:
-
Acordo unánime para impulsar a Illa das Esculturas e para construír un edificio municipal de emerxencias
Por Alejandro Espiño |
-
25 anos da Illa das Esculturas dan lugar a unha revisión do Consello da Cultura Galega
Por Redacción |
-
Antón Castro, comisario da Illa das Esculturas, no 25 aniversario: "Provócame un sufrimento terrible vela así"
Por Mónica Patxot & María José Pita |