O BNG leva ao Parlamento a construción do vial do Vao e a urbanización da avenida da Barca en Poio
Por Oskar Viéitez
O BNG vén de presentar no Parlamento galego unha iniciativa na que demanda a mellora das comunicacións viarias en Poio mediante unha actuación tripla: a construción do vial do Vao entre a Caeira e a estrada de Vilagarcía para desconxestionar a Ponte da Barca, a urbanización da rúa da Barca entre a ponte e Andurique para darlle características plenamente urbanas e gañar espazos peonís, e a mellora da mobilidade e da seguridade viaria da PO 308 entre A Porteliña e A Seca.
O Vial do Vao é unha infraestrutura pendente de construción que conectaría a estrada autonómica PO 310 de acceso a Campañó (na Caeira) e a estrada autonómica PO 531 (Pontevedra-Vilagarcía).
O BNG entende que o vial do Vao xunto coa Variante de Alba permitiría crear unha rolda exterior entre a estrada litoral PO 308 (Pontevedra-O Grove) e a estrada N-550 (Pontevedra-Santiago), "articulando e mellorando de maneira substancial a mobilidade en toda a zona".
Segundo Luís Bará, "o Vial do Vao é unha nova estrada duns 500 metros de lonxitude que tería unha incidencia moi favorable na desconxestión da Ponte da Barca e permitiría levar a cabo unha importante transformación do primeiro treito da PO 308 na zona da Barca, dándolle caracteristicas plenamente urbanas".
Na iniciativa rexistrada no Parlamento, o BNG demanda que xuntamente co proxecto da nova estrada coñecida como Vial do Vao, se contrate un proxecto de remodelación, urbanización e ordenación da mobilidade na PO 308 na Barca e Andurique, até cando menos a rotonda que dá acceso a Lourido e á AP 9. E asimesmo un proxecto de acondicionamento e mellora da PO 308 entre este punto e A Seca.
Para o deputado nacionalista Luís Bará, "estamos diante dunha iniciativa que debe ser estratéxica e prioritaria para a Xunta" porque, segundo argumenta, serviría para mellorar a conectividade e a mobilidade entre a costa e a estrada de Santiago e ademais permitiría darlle características plenamente urbanas ao primeiro treito da PO 308, unha zona densamente habitada, na que hai moita mobilidade peonil e actividade de servizos, "e na que existen moitos problemas de seguridade viaria e son frecuentes os atropelos a peóns".