As ideas do alumnado de Barcelos para cambiar as prazas máis senlleiras da cidade
Por Alejandro Espiño
E se os nenos e nenas de Pontevedra puideran cambiar o espazo público de Pontevedra? Como serían as prazas que eles deseñarían? As respostas a estas preguntas viñeron da man do alumnado de sexto de Primaria do colexio Praza de Barcelos.
Dentro da clase estiveron a traballar nun proxecto competencial para propoñer diversas actuacións en cinco prazas públicas do núcleo urbano pontevedrés. E puideron expoñelas diante do alcalde, Miguel Anxo Fernández Lores, e o concelleiro de Educación.
Para a Praza de Galicia, por exemplo, a súa idea principal foi cambiar a fonte que hai por un parque de auga. Entenden que daría moita vida a esta zona e sería unha actuación novidosa, que debería ir acompañada por máis limpeza e a instalación dun chan antideslizante.
Na Praza da Ferrería e na Praza da Pedreira, os rapaces propuxeron cambiar os papeleiras por recipientes para reciclaxe, renovar os bancos, colocar fontes de auga potable, instalar un chorro de auga ou organizar torneos de xogos populares.
As outras dúas prazas para as que presentaron as súas ideas foron o ámbito da Praza de España e a Alameda e a Praza do Teucro.
Para a primeira destas zonas, propuxeron instalar xogos de mesa, fontes de auga potable para as persoas e para os animais, ramplas para que a xente en cadeira de rodas poida acceder a todas as zonas da praza, papeleiras para reciclar e farois que dean luz en todo este ámbito.
Ademais, pediron cambiar os bancos de pedra por uns máis cómodos, arranxar o chan da parte das árbores e renovar os pasamáns e as escaleiras.
No caso da Praza do Teucro, por último, a súa idea pasaría por poñer unhas árbores cunha copa máis densa, instalar fontes de auga potable ou poñer papeleiras das tres cores para reciclar, arranxar as escaleiras e cambiar os bancos de pedra.
Os políticos locais aseguraron que tomaron boa nota destas suxestións.