As alfombras florais volven encher de cor o Corpus de Cerponzóns
Por Redacción
A parroquia de Cerponzóns celebrou este domingo o seu Corpus Christi que, como manda a tradición, incluíu a habitual elaboración de alfombras florais.
No adro da igrexa de San Vicente de Cerponzóns, como todos os anos, comezáronse a elaborar as alfombras a partir das sete da mañá.
Os veciños e veciñas da parroquia, que forman parte da Federación Galega de Alfombristas, realizaron uns fermosos mantos que foron admirados polos asistentes ao acto litúrxico do Corpus, celebrado ás 13:15 horas.
A misa principal, oficiada polo párroco Herminio Sande, tivo gran afluencia de público e a continuación tivo lugar a procesión, acompañada pola música tradicional que desde primeiras horas da mañá púidose escoitar por diversos lugares da parroquia.
As alfombras de flores son obras de arte efémera que tradicionalmente se elaboran con pétalos de flores, flores enteiras ou herbas.
Este ano en Cerponzóns usáronse unhas vinte especies de flores, ademais de diversos materiais como uvas, cunchas de berberecho, cunchas de zamburiña, mimosas, follas de magnolio, follas e landras de eucalipto, follas de camelio, canas, carozos, virutas ou palmeiras.