Todo listo para festexar o San Bernabé de Cerdedo o sábado 8
Por Redacción
Todo listo en Cerdedo-Cotobade para celebrar as festas na honra de San Bernabé de Cerdedo, que terán lugar este sábado 8 de xuño.
O alcalde e a tenente alcalde de Cerdedo-Cotobade, Jorge Cubela e Lourdes Ovelleiro presentaron este xoves a programación acompañados polos integrantes da Comisión de Festas Xacobe Peleteiro, Santiago Antelo e Jose Antonio Garrido.
O programa festivo comezará pola mañá cedo cun pasarrúas a cargo da Banda de Música de Cerdedo, que irá animando á veciñanza.
Ás 13.00 horas terá lugar a misa solemne cantada por Ana e Alfredo, seguida de procesión e tirada de fogos de artificio.
Pola noite, haberá unha gran verbena amenizada pola disco móbil 'Dolce Vita' e polo trío Azabache. En caso de mal tempo, instalarase unha gran carpa.
Jorge Cubela felicitou á comisión, agradeceu todo o esforzo que realizan e renovou o compromiso do Concello coa organización deste tipo de actividades a través do Plan Cultural, que permite que grupos musicais do municipio participen e actúen neste tipo de celebracións.