En marcha os traballos para recuperar o leito do río na praia de Areas
Por Oskar Viéitez
O Concello de Sanxenxo iniciou esta semana os traballos para recuperar o leito do río na praia de Areas, reconstruír o dique, roto polos temporais, e devolver o areal ao seu perfil orixinal respectando o espazo dunar.
Uns traballos que acometerá a administración local e que ascenden a case 43.000 euros.
O alcalde, Telmo Martín, visitou este xoves as obras que está previsto que acaben a próxima semana.
A execución dos traballos organízase en 4 fases, sendo a primeira a correspondente á escavación dun novo leito para devolver a desembocadura a estado natural. Estímase que o volume do movemento de terras é de 2.293 metros cúbicos.
Seguirá o recheo de area do actual leito con material procedente da escavación e a recolocación de aproximadamente 10 metros de dique ademais da limpeza do leito. Nos traballos terá coidado en respectar a vexetación existente, fundamentalmente o Carrizo (Phragmites australis), xa que serve como elemento de retención da area. A zona de limpeza de leito abarcará uns 60 metros lineais de río.
Doutra banda, xa se concluíron os traballos do muro derrubado polas intensas choivas na praia de Canelas e acondicionado o acceso á fonte que existe no extremo esquerdo do areal. O Concello prevé, ademais, acondicionar esa entrada á praia polo que solicitou unha subvención para a recuperación do sistema dunar, a eliminación da circulación rodada e a mellora do acceso peonil.
O proxecto que rolda os 40.000 euros foi presentado á liña de axudas do Fondo de Compensación Ambiental da Xunta de Galicia.
Relacionadas:
-
Un grupo de voluntarios pon a punto a praia de Praceres
Por Redacción |
-
Recuperar o leito do río na praia de Areas custará 37.000 euros
Por Oskar Viéitez |
-
Encargan un estudo para recolocar a area de Silgar e recuperar o leito natural do río en Areas
Por Oskar Viéitez |
-
VÍDEO.- A praia de Areas está irrecoñecible
Por Oskar Viéitez |