O BNG pon o foco no amianto das instalacións municipais de Sanxenxo e esixe a retirada
Por Redacción
O grupo municipal do BNG de Sanxenxo puxo o foco na presenza de amianto na instalacións municipais e no cumprimento da lei de residuos e solos contaminantes para unha economía circular, que insta ás institucións públicas a elaborar un listado público no que figuren todos os equipamentos que conten con cubertas de amianto.
Os nacionalistas centran a atención nesta situación porque, segundo denuncian, o goberno local de Sanxenxo non deu resposta á solicitude de información realizada sobre este particular en maio e porque saben que a día de hoxe o pavillón da Florida conta cunha cuberta de amianto.
Ante esta situación, o BNG insta o Concello de Sanxenxo a que aclare e confirme se está dando cumprimento á lei, que pide que os concellos deben ter ese listado de edificios con amianto no prazo dun ano desde a entrada en vigor da lei, polo que xa tería que estar á disposición da veciñanza desde o 2023.
Lembran, ademais, que a lei esixe fixar un calendario cos pertinentes prazos de retirada deste material.
O BNG propón que se aproveiten as vacacións de verán, cando non hai actividade nas instalacións, para proceder á renovación da cuberta da Florida e insta ao Concello a que cumpra coa lei.