A rexeneración da ría de Pontevedra, unha prioridade para o "escano galego" en Europa
Por Alejandro Espiño
Para o BNG, a rexeneración integral da ría de Pontevedra será unha prioridade no traballo que desempeñará Ana Miranda como eurodeputada. Así o anunciou este mércores a portavoz nacional do partido, Ana Pontón, que reivindica que o seu será o "escano galego".
Coa ría de fondo, Pontón lamentou que este enclave, a pesar de ser "un dos ecosistemas máis ricos de Europa", leve anos perdendo produtividade, o que se está traducindo na consecuente diminución do emprego e nunha caída nas rendas das mariscadoras.
A pesar da “situación dramática” da ría, que tamén prexudica á súa navegación e á práctica dos deportes náuticos, "nin o Goberno do Estado nin o da Xunta teñen feito absolutamente nada”, censurou a líder do BNG, para reverter esta situación.
Durante a súa visita a Pontevedra, a dirixente nacionalista referiuse ás consecuencias da contaminación "física e política" provocada por Ence e denunciou que as políticas ambientais do PP "son unha máquina de crear cambio climático”.
Os populares, engadiu Ana Pontón, "lonxe de defender as nosas rías, defende os intereses das súas empresas amigas", apoiando proxectos como o de Altri "que só poden apoiar os que practican o negacionismo climático, como na práctica fai o PP".
Coidar o territorio, segundo Pontón, "é a única opción se queremos unha Galiza con futuro", polo que pediu o voto ao BNG nestas eleccións europeas para defender "con feitos" o coidado ao medio ambiente e o saneamento das rías.
A candidata do BNG nestes comicios europeos, Ana Miranda, comprometeuse a traballar para que Galicia reciba o financiamento europeo necesario para acometer a rexeneración da ría de Pontevedra porque, segundo destacou, "é para o que teñen que servir estes fondos".
"Da mesma forma que acadamos a rexeneración da ría do Burgo, lograremos o saneamento da ría de Pontevedra", sostivo Miranda, que considera que actuacións deste tipo "son un antídoto fundamental ante esta urxencia que é o cambio climático".