Cuntis avanza na limpeza e retirada de maleza en camiños, espazos públicos e beiravías
Por Redacción
O alcalde de Cuntis, Manuel Campos, vén de supervisar o zafarrancho de limpeza de cunetas, vías asfaltadas e de diferentes espazos públicos posto en marcha polo Concello.
A día de hoxe, os operarios municipais están a actuar na parroquia de Couselo, centrándose na retirada de maleza nos arcéns das vías. Nas semanas anteriores tamén se procedeu a limpar e adecentar diferentes zonas en Portela e Arcos.
Para o desenvolvemento destas actuacións estase a facer uso de tres tractores complementados con traballos manuais en puntos como nas inmediacións das escolas unitarias ou en áreas recreativas.
Actualmente hai unha cuadrilla traballando na senda fluvial do río Gallo. Tal e como recorda o alcalde, este é un dos espazos de referencia de Cuntis, que non só supón un punto de encontro para a veciñanza, senón que tamén atrae a un gran número de visitantes, polo que se trata dunha zona na que se leva a cabo un mantemento periódico ao longo de todo o ano.
Precisamente, hai menos dun mes culminaron os traballos de reparación dunha das pasarelas de madeira que foran danadas polas riadas.
Ademais, Manuel Campos recorda que estas tarefas tamén se están levando a cabo para a celebración do Campionato Galego XCM – XI BTT do Lacón, que terá lugar o vindeiro domingo, 9 de xuño, e cuxo circuíto transcorrerá por esta zona.
Previamente, os operarios deixaron a punto a Carballeira de Troáns e as inmediacións da capela de San Ramón, así como outros lugares nos que nestas datas están a levarse a cabo eventos e celebracións de todo tipo.
Campos Velay salienta a importancia destes traballos, que se repiten en varias ocasións para evitar que a maleza volva crecer. "As boas condicións meteorolóxicas dos últimos días permitíronos avanzar máis rápido, aínda que a limpeza xa comezou hai varias semanas", sinalou o rexedor cuntiense.
"O ano pasado fixemos ata tres pasadas para manter os espazos e as cunetas a punto e a previsión nestes días é manter esa frecuencia", indicou Campos, que lembrou que nesta época do ano a prioridade son, ademais dos espazos públicos, as vías e estradas asfaltadas.
"Temos unha rede viaria moi extensa en Cuntis", recorda o alcalde, que explica que no inverno os traballos céntrase sobre todo nas pistas forestais.
Relacionadas:
-
Un grupo de voluntarios pon a punto a praia de Praceres
Por Redacción |
-
Cuntis recibe unha achega provincial para mellorar os accesos aos núcleos de Vilariño, Noval e Mesego
Por Oskar Viéitez |
-
Cuntis recibe case 43.000 euros para mellorar a accesibilidade no pavillón municipal
Por Oskar Viéitez |
-
O Fondo Galego fortalece a cooperación coa rexión de Cacheu en Guinea-Bissau
Por Redacción |