A provincia contará este domingo con 1.347 mesas electorais que estarán atendidas por 4.041 persoas
Por Oskar Viéitez
A Subdelegación do Goberno en Pontevedra ten en marcha a planificación loxística para garantir o correcto desenvolvemento das Eleccións ao Parlamento Europeo do próximo 9 de xuño.
Nestes días, 96 empregados da Subdelegación están a preparar todo o material electoral que se remitirá ás 1.347 mesas electorais que se constituirán o próximo domingo distribuídas en 660 locais electorais. O material inclúe: actas, sobres, kits de material de oficina e trípticos da accesibilidade, para garantir o correcto exercicio do dereito ao voto de todas as persoas.
Haberá dispoñibles preto de 2.500 urnas e 1.000 cabinas para elixir as papeletas.
Estas mesas estarán atendidas por 4.041 membros de mesa, aínda que están convocadas máis de 12.123 persoas, entre titulares e suplentes. O domingo, 730 representantes da Administración encargaranse de verificar a correcta apertura das mesas, resolver incidencias e recoller os datos de participación e do reconto de voto. Ademais, durante a xornada electoral, na sede da Subdelegación haberá persoal habilitado para solucionar calquera incidencia que poida xurdir cos representantes, a constitución das mesas ou o material, en colaboración coas Xuntas Electorais.
Nos últimos días, desde a Subdelegación distribuíronse tamén os máis de 18 millóns de papeletas que se repartirán entre todas as mesas electorais da provincia e se porán a disposición de Correos e da Delegación do Instituto Nacional de Estatística de cara ao seu envío ao estranxeiro para garantir o voto CERA.
Un total de 915.122 cidadáns da provincia de Pontevedra teñen dereito ao voto, dos que 42.570 farano por primeira nunhas Eleccións Europeas por ter alcanzado a maioría de idade dende a última convocatoria.
No colectivo hai 2.643 persoas cidadás da Unión Europea residentes na provincia e, pola contra, 139.200 representan a pontevedreses que viven fóra das fronteiras españolas. Estas últimas recibirán no seu domicilio a documentación necesaria para depositar o voto, ben nos locais habilitados nos países de destino ou ben por correo certificado.
Estas Eleccións decidirán un total de 720 eurodeputados, dos que España elixe 61. Nas Eleccións ao Parlamento Europeo existe unha única circunscrición a nivel nacional, a diferencia das autonómicas ou xerais, nas que as provincias son as que marcan as divisións territoriais. Deste xeito, existe tan só unha lista única de candidatos para toda España.