Teletraballo, hábitos de consumo... as novas tendencias do mercado disparan os cambios de uso de baixos a vivendas
Por Natalia Puga & Mónica Patxot
O comportamento do mercado inmobiliario está en evolución constante e en Pontevedra vívese desde hai meses unha tendencia que rebela un xiro no sector. O Concello rexistra un goteo constante de peticións de cambio de uso de locais comerciais e oficinas que pasan a ser vivendas.
Así o confirman desde o goberno local. Desde xaneiro de 2023 chegaron á administración 18 solicitudes de cambios de uso de terciario, que se refiren a baixos, entresollados e primeiros pisos que agora piden pasar a residencial, isto iso, ser recoñecidos como vivendas.
Deses 18 casos solicitados, o Concello concedeu sete, aqueles que cumprían os requisitos urbanísticos. O concelleiro de xestión urbanística, Alberto Oubiña, constata que só se conceden aqueles que cumpren coa normativa. Primeiro chega a solicitude, os servizos técnicos valórana e, se se dan as circunstancias, a Xunta de Goberno local autorízao.
Más da metade das licenzas non se conceden porque require unha transformación total do local para que sexa habitable. "En moitos casos non se cumpren as condicións de habitabilidade. Hai normativas de habitabilidade que hai que cumprir. Unha oficina que teña un baño non é suficiente. O que compre é estar atentos para garantir que ese cambio se faga garantindo a normativa", insiste Oubiña.
As casuísticas son variadas, pero o máis habitual é que os propietarios busquen, con este trámite, dar nova vida a baixos e oficinas desocupadas transformadas en vivendas que si terán saída no mercado. "En moitos casos, afecta a antigos entrechans que se empregaban para oficinas, o que se fai é un cambio de uso e adaptar para vivendas", explica Oubiña, que atribúe esta nova tendencia ao momento actual no que crecen "os requerimentos de vivendas e espazos para vivir".
Contextualiza algúns casos no actual mercado de traballo, pois, co aumento do teletraballo desde a pandemia, "as oficinas en moitos casos non están a usarse como hai anos e, antes de ter locais baleiros, faise este cambio de uso".
O comportamento do mercado é o que empuxou a Sebastián Filgueira a pedir o ano pasado un cambio de uso. Tiña dous locais comerciais na rúa Santa Clara e, cos novos hábitos de consumo, decidiu cambiar de uso uno deles. Eran negocios complementarios e buscaron, segundo explica graficamente, "repartir os ovos de cesta".
"O motivo foi buscar racionalidade económica", explica Filgueira, que transformou un comercio en vivendas turísticas
"O motivo foi buscar racionalidade económica", explica Filgueira, que transformou un antigo comercio especializado en téxtil para o fogar, Olbe, en vivendas turísticas. A idea xurdiulle tras coñecer a sentenza que limita en Pontevedra os pisos turísticos aos baixos e primeiros pisos. "Lendo a sentenza, xurdiu a idea" e púxose ao choio.
As obras comezaron en Semana Santa de 2023 e a finais de agosto abriron o negocio O inverno "é longo e duro", pero o verán preséntase con moi boas expectativas para amortizar o investimento. Ten tres apartamentos totalmente equipados e con deseño funcional, moderno e adaptado para persoas con discapacidade e non lle falta demanda.
O trámite non resultou sinxelo e Sebastián Filgueira aclara que non se pode cambiar o uso directamente, senón que, no seu caso, foi necesario pedir dúas licenzas para abrir a vivenda turística, unha ante a Xunta de Galicia e outra no Concello de Pontevedra. Sen unha, non se pode lograr a outra.
Para este pontevedrés supuxo pedir un cambio de uso dun baixo con licenza como local comercial para pasar a ser vivenda turística, o que impide que poida ser unha vivenda ao uso na que se poida censar un cidadán. Para facelo, tivo que adaptar o local de tal forma que cumpra as condicións de habitabilidade.
A licenza de Figueira é unha das concedidas no último ano e medio e, entre as outras seis, hai todo tipo de situacións, pero un obxectivo común, dar nova viva aos espazos urbanísticos. "O positivo é que estás a evitar que os locais estean baleiros", explica Oubiña, que engade que a transformación de usos "non é unha cousa necesariamente boa nin mala, é distinto".
Relacionadas:
-
O Concello de Pontevedra dá licenza de construción para catro apartamentos turísticos
Por Redacción |
-
No centro histórico só se autorizarán vivendas de uso turístico en edificios completos, en baixos ou nos primeiros andares
Por Oskar Viéitez |
-
Un edificio de nova construción en San Roque para catro vivendas turísticas
Por Alejandro Espiño |