Feridos os condutores dun patinete e unha bicicleta que chocaron na praza de España
Por Redacción
Unha moza de 19 anos e un mozo de 28 tiveron que recibir atención hospitalaria no Hospital Montecelo de Pontevedra tras verse implicados nun accidente no que chocaron cando ambos circulaban nun Vehículo de Movilidad Personal (VMP) e unha bicicleta.
Segundo a información facilitada pola Policía Local de Pontevedra, o accidente consistiu nun choque frontal rexistrado sobre as 22.30 horas da noite deste domingo 2 de xuño na praza de España de Pontevedra.
A moza de 19 conducía un patinete eléctrico (VMP) e o mozo de 28 ía en bicicleta. Os vehículos circulaban en sentido oposto e, cando un e outro percibiron ao contrario, trataron de evitarse, pero non o lograron.
Así, a Policía Local explica que ambos adoptaron medidas evasivas en espello (cada un viraba para o mesmo lado) e os vehículos finalmente chocaron.
Cando chocaron e se proxectaron cara adiante, "chocaron coas cabezas", segundo a información facilitada pola Policía Local.
Os dous condutores quedaron conmocionados, foron trasladados a Montecelo e quedaron ingresados en observación.