Os postos vacantes dos mercados de Marín saen a poxa con prezos de ata 17.000 euros
Por Redacción
Nove postos vacantes e bancadas dispoñibles nos Mercados de Marín sairán á poxa despois de que se aprobe por parte da Alcaldía da vila o expediente para a adxudicación das concesións destes espazos de dominio público para uso privativo.
Trátase de catro bancadas na Praza de Abastos, outras catro no Patio Sur na zona do Multiúsos e un posto no mercado de Seixo. As superficies oscilan entre os 3 e os 3.30 metros cadrados das bancadas de peixe e os 6,70 e 7,60 do Multiúsos. O posto de Seixo chega aos 17,45 metros cadrados.
Os prezos de saída da poxa oscilan entre os 3.969,99 euros e os 17.013,75 euros, que ten como canon mínimo o posto no mercado de Seixo debido á súa ampla superficie.
Os pregos de cláusulas administrativas para a adxudicación a través de poxa, por un prazo de 30 anos, publicaranse no Boletín Oficial da provincia, no Diario oficial de Galicia e no taboleiro de anuncios do Concello de Marín.
Dende o goberno local preténdese con estas adxudicacións promover o negocio nestes establecementos que se encontran "nun ámbito humanizado", que se completará coa mellora da entrada principal á Praza de Abastos.