O 'Concilia Bueu' amplía horarios e ofrece servizo de comedor
Por Redacción
O Concello de Bueu prepárase para a realización da nova edición do programa ‘Concilia Bueu’, que nesta edición traerá importantes novidades con respecto aos anos anteriores, como é a ampliación de prazas, a duración do programa, o horario diario, ou a posibilidade de comedor.
O prazo de inscrición estará aberto dende o 5 ao 12 de xuño, e dende a concellaría de benestar social informan que o programa terá un custe económico para as familias, despois de que se aprobe o prezo público na Xunta de Goberno previsto para a próxima semana. Previsiblemente será de 50 euros cada mes de xullo e agosto, e 12,5 euros nas semanas do 24 ao 28 de xuño, e do 2 ao 6 de setembro.
Tamén se amplía o horario ata as 15 horas, e existirá un servizo de comedor que as familias poderán contratar co cátering asignado.
En total convócanse 120 prazas en cada quenda, das cales 10 estarán reservadas para persoas en risco de exclusión social.
A participación polo procedemento xeral segue unha orde de adxudicación, sendo as solicitudes prioritarias as que pertenzan a nenos, dun mínimo de 3 meses, empadroados en Bueu. Estas prazas serán adxudicadas segundo a situación socio-familiar e laboral familiar. No caso de non cubrir as solicitudes que compoñen este procedemento, os nenos e nenas empadroados noutros concellos poderá optar a estas prazas vacantes.
As persoas interesadas en participar deberán presentar as solicitudes de forma presencial ou en formato electrónico a través da Sede Electrónica do Concello de Bueu