Problemas circulatorios na N-550 en Alba por un accidente entre un autobús escolar e unha furgoneta cun ferido
Por Natalia Puga
Unha persoa resultou ferida na mañá deste mércores nun aparatoso accidente de tráfico rexistrado na estrada N-550 na parroquia pontevedresa de Alba.
O sinistro rexistrouse ás 9.00 horas e consistiu nunha colisión entre un autobús escolar e unha furgoneta. Resultou ferido o condutor da furgoneta. No autobús viaxaban o condutor, dous menores e unha coidadora e todos resultaron ilesos.
Como consecuencia do accidente, producíronse importantes retencións na zona, á altura do quilómetro 115 da N-550, segundo a información facilitada polo 112 Galicia.
Ata o lugar do accidente desprazáronse efectivos do 061, que atenderon ao condutor da furgoneta, e tamén axentes da Garda Civil de Tráfico, a Policía Local e Protección Civil de Pontevedra. Tamén foron alertados os Bombeiros.
O accidente rexistrouse diante do bar O Novo Mirador de Alba, aínda que a pouca distancia xa da parroquia de Cerponzóns. É un punto coñecido porque xusto aí está un cruzamento que comunica a estrada nacional N-550 -coñecida como a estrada de Santiago- coa PO-531 -estrada de Vilagarcía-.
Nesta zona da rede viaria, os veciños levan anos pedindo a construción dunha rotonda.