1.800 escolares berran no Correlingua polas rúas de Pontevedra: "Dende aquí até acolá, galego xa!"
Por Oskar Viéitez
Miles de rapaces percorreron este luns as rúas de Pontevedra baixo o lema de "Dende aquí até acolá, galego xa!", nunha nova edición do Correlíngua que este ano inclúe o certame do Cantalingua, concurso no que participan bandas que canten en galego.
Ata 1.800 rapaces participaron desta festa en Pontevedra. E non só centros educativos da vila senón tamén chegados dende Ponte Caldelas, Portas, Vilagarcía, e mesmo Rianxo e Ribeira.
"Dende aquí queremos berrar ben alto que non nos apetece, non nos presta e non nos peta que a nosa lingua esmoreza", dixeron alto e claro no seu manifesto. "Deixemos de preocuparnos polo galego e ocupémonos del", aconsellaron.
O Correlingua é unha actividade de carácter autonómico que transita dunha a outra localidade cun denominador común que é a promoción do uso do galego na mocidade e na infancia.
Está organizada pola Asociación Cultural Correlingua e conta coa axuda loxística da CIG-Ensino, a Mesa pola Normalización Lingüística e a Asociación Socio-Pedagóxica Galega, así como coa colaboración das deputacións de Pontevedra, A Coruña e Lugo e os concellos de Pontevedra, Santiago de Compostela, A Coruña, Ourense, Vigo e Lugo, entre outros doce municipios.
No remate da carreira, na Alameda, o alcalde de Pontevedra, Miguel Anxo Fernández Lores, deu a benvida a toda a rapazada e logo comezou a actuación de A Gramola Gominola.
O Correlingua é unha proposta de carácter lúdico-educativo na que participan os centros de ensino nun acto público de reivindicación do "dereito a medrar en galego" e tamén en defensa do uso do noso idioma como "única forma de garantir o seu futuro".
O Correlingua, que xa vai pola súa décimo oitava edición, alcanzou ao longo destes anos unha alta participación dos centros de ensino e do alumnado, así como o apoio de persoeiros e organizacións de todo tipo.
A deste luns foi outra xornada de reflexión sobre a situación da lingua e a importancia de activar as accións en prol dela, tamén un día para sensibilizar á sociedade, a través da poboación infantil e moza, da importancia da defensa da lingua e, como non, asociar a reflexión lingüística a actividades colectivas, lúdicas e amenas ademáis de contribuír a manter vivo o noso patrimonio implicando ás xeracións máis novas.